देशमा राष्ट्रपति शासन ल्याउने षड्यन्त्र भइरहेको माओवादी दावी

Written by Sitaram Baral

Thursday, 02 July 2009 19:44

काठमाण्डौ - एकीकृत नेकपा (माओवादी) का वरिष्ठ नेता मोहन वैद्य (किरण) ले देशमा राष्ट्रपति शासन ल्याउने षड्यन्त्र भइरहेको दावी गरेका छन् ।

कांग्रेसको एउटा गुट र एमालेको केपी ओली गुट भारतको दलाली गर्दै राष्ट्रपति शासन ल्याउने षड्यन्त्रमा लागेको आरोप लगाएका हुन् । 'मुठभेडको अवस्था बनाएर संकटकाल हुदै राष्ट्रपति शासन ल्याउने षड्यन्त्र भइरहेको छ' किरणले भने- 'नेपाली कांग्रेसको एउटा गुट र एमालेको केपी ओली गुट भारतको दलाल बनेर षड्यन्त्रमा लागेका छन् ।' आफूलाई लोकतन्त्रको मसिया भन्नेहरु नै लोकतन्त्रको हत्या गर्न उद्धत रहेको आरोप लगाउँदै किरणले वर्तमान सरकार विदेशीको कठपुतली भएको दोहोर्‍याए । भारतीय पत्र-पत्रिकाले नै वर्तमान सरकारलाई भारतीय पक्षको भनी व्याख्या गरेको उल्लेख गर्दै नेता किरणले भने- 'सरकार विदेशी दलालहरुको हो भन्ने प्रमाणित भइसकेको छ ।'

सरकार लामो समय टिक्न नसक्ने दावी गर्दै माओवादी नेता किरणले प्रधानमन्त्री माधवकुमार नेपालले तत्काल राजीनामा दिनुपर्ने मागपनि गरेका छन् । 'यो सरकार टिक्ने कुनै नैतिक आधार छैन' किरणको भनाई छ- 'त्यसैले, प्रधानमन्त्रीले आफै राजिनामा दिनु नै उपयुक्त हुनेछ ।' राष्ट्रपतिको कदम पछि उत्पन्न असमझदारी हटाउन सदनमा नागरिक सर्वोच्चताका लागि प्रधानमन्त्री माधवकुमार नेपालको सम्बोधन आउनुपर्ने भनेको तर त्यसको बेवास्ता भएको उनले बताए । 'यो कुरा प्रधानमन्त्रीले स्वीकार गरेपनि कार्यान्वयन भने गरेका छैनन्, अबपनि कार्यान्वयन नगर्ने हो भने कडा कदम चाल्न हामी बाध्य हुनेछौं' उनले चेतावनीको भाषामा भने- 'नागरिक सर्वोच्चताका पक्षमा सम्बोधन नआएसम्म सदन चल्न दिँदैनौं ।'

जनविद्रोहको बाटोलाई कायमै राखी मेलमिलापको सरकार निर्माणको योजनामा लागेकोपनि उनले बताएका छन् ।

वर्तमान सरकारविरुद्ध गणतन्त्रवादी राष्ट्रवादीहरु एक भएर लाग्नुपर्ने बताउँदै माओवादी नेता किरणले जनताको बलले सरकार ढल्ने अवस्था रहेको दावीपनि गरेका छन् । यो सरकार जनताको बलमा ढल्छ त्यसपछि माओवादीकै नेतृत्वमा राष्ट्रिय सहमतिको सरकार बन्नेछ' उनले भने- 'प्रधानमन्त्री बन्नकालागि हाम्रो दलभित्र एक से एक सक्षम नेताहरु छन् ।' स्मरणीय छ, पूर्णरुपले क्रान्ति सम्पन्न नभैकन माओवादी अध्यक्ष प्रचण्डले सरकारको नेतृत्व नगर्ने आन्तरिक निर्णय माओवादीले गरिसकेको छ । 'त्यसो भए सरकारको नेतृत्व माओवादीको कुन नेताले गर्छन् त ?' भन्ने सन्चारकर्मीहरुको प्रश्नको उत्तर दिँदै नेता किरणले भने- 'हाम्रो पार्टीमा प्रधानमन्त्री बन्न प्रचण्ड, डा. बाबुराम भट्टराई, नारायणकाजी श्रेष्ठ मात्र होइनन्, रामबहादुर थापा (बादल), कृष्णबहादुर महरा, देव गुरुङ्ग जस्ता नेताहरु पनि छन् ।'

रिपोटर्स क्लवले आयोजना गरेको साक्षात्कार कार्यक्रममा नेपाली कांग्रेसका केन्द्रीय सदस्य डा. रामशरण महतपनि उपस्थित थिए । माओवादी संकटकालको अवस्था सृजना गर्न लागिपरेको आरोप लगाउँदै महतले प्रधानसेनापति सम्बन्धी टुंगो लागिसकेको विषयमा ढिपी नछाडेर मुठभेडको अवस्था ल्याउन खोजेको दावी गरे । 'सरकार, सदनको कार्यव्यवस्था समिति र संविधान सभामा प्रतिनिधित्व गर्ने २२ दलले टुंगो लगाइसकेको विषयमा ढिपी गरेर माओवादीले अस्थिरता सृजना गर्न खोजिरहेको छ' उनले भने- 'यस्तो अवस्थामा भविष्यमा उत्पन्न हुनसक्ने कुनैपनि परिस्थितिको जिम्मेवार माओवादीले लिनु पर्छ ।' कांग्रेस नेता महतले वर्तमान सरकार ढल्ने कुनै सम्भावना नरहेको दावीपनि गरे । 'माओवादीले सरकार ढालेर अर्को सरकार बनाउँछु भन्नु कल्पना मात्र हो' महतले भने नेपाली जनतालाई सरकार फेर्नेमा मात्र लागेर अलमलिने समय छैन ।'

-Sitaram Baral in Kathmandu