नयाँ राष्ट्रिय सरकार निर्माणको पहल सुरु भएको दाबी

Written by Sitaram Baral

Thursday, 02 July 2009 06:49

काठमाण्डौ - वर्तमान सरकारको विकल्पमा नयाँ राष्ट्रिय सरकार निर्माणको पहल सुरु भएको छ ।

मधेश जनअधिकार फोरमका अध्यक्ष उपेन्द्र यादवले एमालेको संस्थापन पक्ष बर्तमान सरकार ढाल्ने योजनामा रहेको खुलाशा गरेका छन् ।

यस सम्बन्धमा एमाले अध्यक्ष झलनाथ खनालले आफूसँग कुराकानी गरेको दावीसमेत अध्यक्ष यादवले गरेका छन् । आफ्नो पक्षलाई सुदृढ बनाउन देशव्यापी दौडाहामा रहेका अध्यक्ष यादवले विराटनगरमा यस्तो दावी गरेका हुन् ।

'यो सरकारलाई असफल भैसक्यो भन्ने एमाले अध्यक्ष झलनाथ खनाललाईपनि लागिसकेको छ' उनले भने- 'नयाँ सरकार बनाउने भनेर स्वयं एमालेकै अध्यक्षले हामीसँग कुराकानी गर्नु भएको छ, त्यसैले अब छिट्टै राष्ट्रिय सरकार निर्माणको बाटो खुल्ला हुँदैछ ।' केही हप्ताभित्रै बृहद् सहमति सहित राष्ट्रिय सहमतिको सरकार निर्माण हुने जानकारीपनि उनले दिएका छन् । राष्ट्रिय सरकारको नेतृत्वपनि सहमतिकै आधारमा निर्माण हुने उनले बताएका छन् ।

पछिल्लो समयमा एमाले अध्यक्ष झलनाथ खनाललेपनि यो सरकारको त्यति बचाउ गरेका छैनन् । उनलेपनि राष्ट्रिय सरकारमा जोड दिएका छन्, तर नेतृत्व कसले गर्ने भन्ने स्पष्ट पारेका छैनन् । विपरित ध्रुबमा रहेका एमाले नेताहरुले एकै मन्चमा रहेर यो सरकारको बचाउ गरेका छैनन् । प्रधानमन्त्री पक्षीय एमालेका नेताहरुले यही सरकारमा माओवादीलाई सामेल गराएर यसैलाई राष्ट्रिय सरकारको स्वरुप दिनुपर्ने धारणा राख्दै आएका छन् । तर यसमा माओवादी सहमत छैन ।

माओवादी अध्यक्ष प्रचण्डले यो सरकारमा माओवादी सामेल हुने एमालेका प्रधानमन्त्री पक्षीय नेताहरुको भनाईलाई षडयन्त्रको संज्ञा दिएका छन् । गृह जिल्ला चितवनमा पारिवारिक भेटघाटकालागि गएका प्रचण्डले 'यो सरकारमा माओवादी सामेल हुँदैछ' भन्ने हल्ला चलाएर २-४ दिन बढि सरकार चलाउने षडयन्त्रमा प्रधानमन्त्री नेपाल सामेल भएको आरोप लगाए । उनका अनुसार, राष्ट्रिय सरकार निर्माणको प्रयास सुरु भैसकेको छ । तर यसबारे उनले विस्तृत रुपमा केही खुलाएका छैनन् ।

'यो विदेशीहरुले बनाइदिएको र हरुवाहरुको कठपुतली सरकार हो, यो असफल भैसकेको छ' प्रचण्डले बुधबार भनेका छन्- 'यस्तो सरकारमा हामी जाने सवालै छैन, यो सरकार छिट्टै ढल्दैछ, त्यसपछि माओवादीकै नेतृत्वमा राष्ट्रिय सरकारको निर्माण हुन्छ ।'

राष्ट्रिय सरकार निर्माणकालागि माओवादीले एमालेको संस्थापन पक्षसँग भित्रभित्रै वार्तासमेत सुरु गरेको छ । सबै दल सम्मिलित राष्ट्रिय सरकार भनेपनि माओवादीले एमालेभित्रको झलनाथ खनाल-बामदेब गौतम समूह, फोरमको उपेन्द्र यादव समूहसहित अन्य साना दलहरुलाई मिलाएर नयाँ सरकार निर्माण गर्ने प्रयास गरेको छ ।

यसै हप्ता सम्पन्न माओवादी पोलिटब्यूरो बैठकमा बरिष्ठ नेता मोहन बैद्य किरणले राष्ट्रिय सरकार निर्माणकालागि एमालेको झलनाथ खनाल-बामदेब गौतम समूहसँग कुराकानी गर्नुपर्ने विचार अघि सारेका थिए । त्यो विचारलाई पोलिटब्यूरोले स्वीकारपनि गरिसकेको छ । सो प्रस्तावलाई मूर्तरुप दिन शनिवार बैद्य-खनालबीच कुराकानीसमेत भएको थियो ।

आगामी हप्ता बस्ने माओवादी केन्द्रीय कमिटीको बैठकले यस सम्बन्धमा बिस्तृत खाका निर्माण गर्ने बताइएको छ ।

-Sitaram Baral in Kathmandu