काठमाण्डौ - हिमाली क्षेत्रका नेपालीहरुकालागि आम्दानीको राम्रो श्रोत बनेको यारसागुम्बा अब मनमुटाव र मृत्युको कारणसमेत बन्न थालेको छ ।

 

 

अर्को जिल्लाबाट आफ्नो जिल्लामा यारसागुम्बा खोज्न आएको भन्दै मनाङ्गको नार गाउँका बासिन्दाले गोर्खाबाट यारसागुम्बा खोज्न गएकामाथि आक्रमण गर्दा ९ जनाको मृत्यु भएको छ । घटना गत जेठ २७ गते भएको हो ।

मृत्यु हुनेहरुमा गोर्खा केरौजाका युवाहरु रहेका छन् । मृत्यु भएका मध्ये ७ जनालाई नारका बासिन्दाहरुले कुटीकुटी मारेका थिए भने नारवासीको आक्रमणबाट बच्न भाग्दा २ जना युवकको भीरबाट लडेर मृत्यु भएको थियो । आक्रमणबाट मारिनेमा गोर्खा केरौजा- १ का ३२ बर्षीय ज्ञानबहादुर गुरुङ्ग, १६ बर्षीय बीरे गुरुङ्ग, १७ बर्षीय कामी गुरुङ्ग, १८ बर्षीय शोभार गुरुङ्ग, ध्रुब गुरुङ्ग, सुबेदार गुरुङ्ग, केरौजा २ का आइतराम गुरुङ्ग छन् । परिचय नखुलेका अन्य दुई जनाको भाग्ने क्रममा मृत्यु भएको बताइएको छ ।

यारसागुम्बा खोज्न गएका युवकहरु लामो समयसम्म घर नफर्केपछि उनीहरुको खोजी गर्दा आक्रमणमा परी मृत्यु भएको पत्ता लागेको प्रहरीले जनाएको छ । यारसागुम्बा खोज्न जाँदा नारबासीले प्रवेशमा रोक लगाएपछि विवाद सुरु भएको थियो । विवादले पछि झडपको रुप लिन पुग्यो । घटना सार्वजनिक भएपछि प्रहरीको टोली घटनास्थलतर्फ लागेको बताइएको छ । घटनास्थल मनाङ्ग सदरमुकाम चामेबजारबाट पैदल दुई दिन टाढा रहेको छ ।

हिमाली क्षेत्रका बासिन्दाले यौनबर्धक मानिने यारसागुम्बाको संकलनबाट लाखौं आम्दानी गर्दै आएका छन् । प्रतिकिलो ७-८ लाख रुपैयाँसम्ममा बिक्री हुने यारसागुम्बाले त्यहाँका बासिन्दालाई आर्थिक रुपले सबल बनाउन थालेपनि यसले विस्तारै झडपको रुप लिन थालेको छ । हिमाली क्षेत्रमा पाइने यारसागुम्बा संकलनकालागि बाहिरी जिल्लाबाटपनि हजारौं मानिसहरु जाने गरेका छन् ।

-Sitaram Baral in Kathmandu