फेरी बज्यो खतराको घण्टी, कोशी बाँध पानीको बहाव पोहर सालभन्दा बढी

Written by Santa Bagam

Friday, 03 July 2009 11:56

काठमाण्डौ - लगातार पानी परेपछि सप्तकोसी नदीमा आएको बाढीले कोसी ब्यारेजको १२ नम्बरको ढोकामा क्षति पुगेको छ ।

पानीको बहाव बढ्दै गएपछि खतराको संकेतस्वरुप रातो झण्डा गाडिएको पत्रकार मनोज श्रेष्ठले जानकारी दिएका छन् । सप्तकोसीको ब्यारेज पुनर्निर्माणको ठेक्का पाएको बशिष्ठा एण्ड बशिष्ठा कम्पनिको कार्यालय रहेको पाँचवटा छाप्रासमेत बगाएको छ । ब्यारेजस्थित जल मापन केन्द्रले असार १९ गते बिहान १० बजे गरेको रेकर्ड अनुसार पानीको बहाव बढेर १ लाख, ८७ हजार, ८ सय ४८ क्युसेक प्रतिसेकेण्ड पुगेको छ । यो गत बर्षको भन्दा २० हजार क्युसेक बढी हो । गत बर्ष भदौमा कोशीको बाँध फुट्दा पानीको बहाव १ लाख, ६७ हजार क्युसेक प्रतिसेकेन्ड थियो ।

सम्भावित क्षति रोक्न ब्यारेजका ५६ मध्य २९ वटा ढोका खोलिएको छ । थप ढोका खोल्न र सम्भावित क्षति रोक्न भारतीय प्रशासनसँग छलफल भइरहेको स्थानिय प्रशासनले जनाएको छ । पानीको बहाव बढेपछि सर्बसाधारण संभावित जनधनको क्षतिले त्रसित बनेका छन् । नदीले सुनसरीको बराह क्षेत्रको दक्षिणबाट पूर्वी किनार कटान गरिरहेकोले सो क्षेत्र उच्च जोखिममा परेको छ ।

यसैबीच, कोसी बाढी पीडितहरुले सरकारद्वारा गठित उच्चस्तरिय छानविन समितिले सिफारिस गरेअनुसारको राहत रकम नदिएको बिरोधमा आज पनि पूर्वपश्चिम राजमार्ग अन्तर्गत सुनसरीको जुद्ध चोकमा यातायात अबरुद्ध पारेका छन् ।

-Santa Bagam in Kathmandu